Ədalətli rəqabətin şərti olan bərabər və şəffaf fiskal mühitin təmin olunması istiqamətində 1 yanvar 2020-ci il tarixdən Vergi Məcəlləsinə əmtəəsiz əməliyyat və riskli vergi ödəyicisi anlayışları daxil edilib.

Azərbaycan Respublikası Nazirlər Kabinetinin 2020-ci il 28 iyul tarixli 265 nömrəli Qərarı ilə təsdiq edilmiş “Riskli vergi ödəyicisinin, o cümlədən riskli əməliyyatların Meyarları”nın azı birinə cavab verən vergi ödəyicisi riskli vergi ödəyicisi hesab olunur.  

Müvafiq qərara əsasən Naxçıvan MR İqtisadiyyat Nazirliyi yanında Dövlət Vergi Xidməti tərəfindən riskli vergi ödəyicisi, o cümlədən riskli əməliyyatlar aparan vergi ödəyiciləri üzrə təhlillər aparılır. Nazirlər Kabinetinin təsdiq etdiyi risk meyarlarına cavab verən şəxslər riskli vergi ödəyicisi hesab olunacaq, həmçinin vergi ödəyicisinin apardığı əməliyyatlar riskli əməliyyat hesab ediləcəkdir.

Bununla yanaşı İqtisadiyyat Nazirliyi yanında Dövlət Vergi Xidməti riskli vergi ödəyiciləri ilə bağlı məlumatların əldə olunması imkanını daha da asanlaşdırıb.  Belə ki, bu məlumatı www.taxes.gov.az və  ntaxes.gov.az  saytlarının “Riskli vergi ödəyiciləri barədə məlumatın verilməsi” bölməsindən Riskli vergi ödəyiciləri barədə məlumatın verilməsi - linkinə keçid alaraq açıq formada əldə etmək mümkündür.